Dagoeneko abian da AEKren Praktikatu zerbitzuaren kanpaina, euskara ZU zara lelopean. Ikasturte honetan, euskaldunon komunitatea osatzeko norbanakoen garrantzia azpimarratu nahi dugu, eta bereziki, mintzapraktika programetako partehartzaileek jokatzen duten papera: egunero hizkuntzan trebatu, praktikatu eta bizi garen guztiok euskaldunon komunitatea osatzen dugu, eta horren alde era aktiboan posizionatzen garenean euskara gara denok.

Mintzapraktika programetan ez dago ez zahar, ez berri; ez hango, ez hemengo... Programen bidez hiztun guztiek gustura eta lasai egiten dute euskaraz, euskaldunon komunitatea indartu eta zabaltzeko. Ideia horixe islatu nahi izan dugu, hain zuzen ere, bideo honetan.

Datozen egunetan hasiko dira elkartzen berbalagun, mintzakide eta mintzalagunak; ikasturte honetan, 103 herritan: Agoitzetik Muskizera edo Tuteratik Zarautzera. Aurten, bestalde, egitasmo berriak abiatuko dira: mintzalaguna Lezon, berbalagun Artziniegan eta, lehen aldiz, gurasolagun programa Hernanin. Iparraldean, AEKk mintzalagun-taldeak abiatuko ditu Lapurdiko bortz herritan: Itsasun, Baionan, Kanbon, Uztaritzen eta Hendaian.

Beti bezala, AEKren Praktikatu zerbitzuan jarraitu egingo dugu euskarazko aisialdia sustatzen ekintza osagarrien bidez. Joan den ikasturtean, esaterako, 500 aktibitate baino gehiago antolatu genituen: besteak beste, tailerrak, irteerak, mintzodromoak, asteburuko egonaldiak, udako ibiltaria, Zilegi Asteak...

Horretaz gain, hitanoa lantzeko Hiketalagun proiektuak aurrera jarraituko dik/din, elkarri hika hitz egiteko talde berriekin. Familientzako gurasolagun taldeetan ere segituko dute jolas, txango eta tailerrak egiten, helduek eta haurrek aukera izan dezaten euskaraz elkarrekin aritzeko. Azkenik, azaroan online-taldeak ere abiatuko dira.

Parte-hartzea doakoa da, eta kide guztiek deskontu zein sari politak eskura ditzakete.

Izena emateko: emanizena.praktikatu.eus

Gure zerbitzuaren asebetetzea neurtzeko, 2024ko maiatzean, inkesta bidali genien PRAKTIKATUk kudeatzen dituen programetako parte-hartzailei; inkesta 1.050 lagunek erantzun zuten. Emaitzen artean, honako puntu hauek nabarmendu nahi ditugu:

• Euskararen erabilera. Inkestan parte hartu zuten bidelarien % 93,5ek adierazi zuen aldaketa bizi izan duela euskararen erabileran: % 49,6k zion askoz gehiagotan egiten duela euskaraz egitasmoan dabilenetik; beste % 40,7k esan zuen gehiagotan egiten duela. Soilik, % 9,7k berdin jarraitzen duela aitortu zuen.

• Balorazio orokorra. Parte-hartzaile gehienek OSO ONDO (8,6) baloratu zuten euren egitasmoa. Halaber, oso ontzat jotzen zuten egindako lana. Parte-hartzaileen testigantza batzuk jaso ditugu: https://praktikatu.eus/testigantzak

Udan ere mintzataldeak osatuko ditugu, uztailean eta abuztuan; eta aukera dago hilabete batean edo bietan parte hartzeko.
Horietakoren batean parte hartu nahi baduzu, zure herriko euskaltegian izena eman edo bete fitxa hau.

Eman izena ekainaren 23 baino lehen.

Apirilaren 27an ospatuko dugu Sopelan Esaera Zaharren Txapelketaren 29. edizioa, Esana haizeak eramaten du; eskribitua han gelditzen da, txurian beltza. lelopean. Parte hartu nahi dutenek bi, hiru edo lau laguneko taldea osatu, 100 esaera zaharren zerrenda ikasi eta erreserba-fitxa bete behar dute apirilaren 22a baino lehen.

Ohi dugun moduan, Sopelako udaletxeko plazan 11:00etan elkartuko dira antolatzaileak, parte hartzaileak, bertsolariak eta goiza musikaz alaituko duten lagunak, txapelketa 11:30ean hasteko. Goiza tabernaz taberna emango dute, bertsoak entzun eta horiekin bat datozen esaerak identifikatu ahala taldeek aurrera jarraituko duten ala ez erabakitzen. Ondoren, bazkaria izango dute Artadi garagardotegian, eta bertan jarraituko dute lehian arratsaldean, finalaurrekoak eta finala Erika Lagomaren eta Manex Agirreren bertsoak lagun dituztela jokatuz.

Parte hartzaile guztiek oroigarria jasoko dute, eta hainbat sari ere banatuko dira.

INFORMAZIOA: 
695 774 015
Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.
praktikatu.eus/esaerazaharrak