2025eko maiatz-ekainean, AEKren PRAKTIKATU Zerbitzuko mintzapraktika programetako partaideek aukera izan dute asebetetze inkesta betetzeko. Pozik gaude, oso. Alde batetik, Euskararen Herri luze zabaleko erantzun kopuru polita jaso dugu, hain zuzen ere, 932. Bestetik, balorazio ona jaso dugu:

• Euskararen erabilerari dagokionez, programek kideen euskararen erabileraren gaineko eragina argia da. Inkestan parte hartu zuten bidelarien % 92,8k adierazi du aldaketa bizi izan duela euskararen erabileran:

  • % 51k uste du askoz gehiagotan egiten duela euskaraz, egitasmoan dabilenetik.

  • % 41,8k esan du gehiagotan egiten duela.

  • Soilik, % 7,2k berdin jarraitzen duela aitortu zuen.

   

• Balorazio orokorra, oro har, primerakoa izan da. Parte-hartzaile gehienek OSO ONDO-BIKAIN (8,8) baloratu dute euren egitasmoa, baita eskertu dinamizatzaileek egindako lana.

Hitz ederrak ere jaso ditugu, baina horien berri irailean emango dizuegu. Bizkitartean, eskerrik asko inkesta bete duzuen guztioi eta segi zuek ere euskara izaten!
 Parte-hartzaileen testigantza batzuk jaso ditugu: https://praktikatu.eus/testigantzak

EUSKARA ZU ZARA KANPAINARI JARRAIPENA EMANGO DIO AEK-REN PRAKTIKATU ZERBITZUAK IKASTURTE BERRIAN

Euskaldunon komunitatea indartzea helburu, eskaintza zabala dakarte AEKren mintzapraktika-programek, euskaraz aritu nahi duenak hainbat aukera izan ditzan.

Norbanakoek euskaldunon komunitatea osatzeko duten garrantzia azpimarratzen jarraitu nahi dugu, eta, bereziki, mintzapraktika-programetako parte-hartzaileen zeregina: egunero hizkuntzan trebatzen garen, praktikatzen dugun eta euskaraz bizi garen guztiok euskaldunon sarea osatzen dugu; eta horren aldeko jarrera aktiboa dugunean, euskara gara denok. Horregatik, mintzapraktika-programetan ez dago ez zahar ez berri, ez hango ez hemengo... Taldeetan guztiok euskaraz gustura eta lasai arituz, euskaldunon “familia” indartzen eta zabaltzen dugu.” Ideia horixe islatu nahi izan dute, hain zuzen ere, bideo honetan.

Proiektuak:

Udako taldeetako kideek elkar agurtu, eta datozen egunotan hasiko dira elkartzen berbalagun, mintzakide eta mintzalagunak euskararen herrialde luze eta zabaleko 104 herritan. Aurten, egitasmo berriak ere abiatuko dira: Mintzalagun Oiartzunen eta, Iparraldean, mintzalagun-taldeak herri gehiagotan sortzeko lanean jarraituko du AEKk.

Ekintzak:

Taldeak ez ezik, ekintzak ere antolatzen dituzte egitasmoetako dinamizatzaileek euskarazko aisialdia sustatzeko, hala nola Lautadako Solasaldi musikatuak, udazkeneko asteburu-pasak familian Tertangan (Bizkaiko Urtxintxa Eskolaren eskutik) eta Hika-topaketak Markina-Xemeinen (ZirHika elkartearekin elkarlanean), hasi berri den ikasturteko hainbat aipatzearren. Joan den ikasturtean, 500 jarduera baino gehiago egin zituzten; tailerrak, irteerak, mintzodromoak, asteburuko egonaldiak, Zilegi Asteak... Aurten ere, hamaika aukera izango dute euskaraz bizi nahi dutenek.

Eskaintza zabala:

Erraz-erraza da, gainera, aukerak gero eta ugariagoak baitira: ikasturteko mintza-taldeak, xede-taldeak, online taldeak, udakoak...”. Parte-hartzea doakoa da, eta kide guztiek deskontuak zein sariak eskura ditzakete. Horrez gain, hitanoa lantzeko Hiketalagun proiektuak aurrera jarraituko dik/din, partaideek hika hitz egiteko talde berriak eginda. Familiek Gurasolaguneko taldeetan ere segituko dute jolas, txango eta tailerrak egiten, helduek eta haurrek elkarrekin euskaraz aritzeko aukera izan dezaten. Mendilagunek ere ibilbideak egingo dituzte euskaraz egin bitartean. Antzera ariko dira kakorratz-taldekoak, Irakurzale klubekoak, eskaladakoak, dantza errazen taldekoak... Eta azkenik, azaroan, online taldeak ere abiatuko dira.

Izena emateko: emanizena.praktikatu.eus

Jarraitzeko:

• Facebook

• x.com/praktikatu

• Instagram

Ikasturte ederra joan da; gogoz hasi genuen eta gogoz hartu dugu uda ere.

Orain oporraldia datorkigu, lanak atsedenari utz bekio tokia, hura ere ondo hartuko dugu eta. Baina ez kezkatu, hau ere gero arte bat baizik ez da, irailean bueltan izango gaituzue, indarberrituta eta saltsarako desiratzen.

Oporretan ere, euskaraZUZARA!

Gu irailean itzuliko gara!