Gatikan: Orientazio proba

“Kirola eta Natura” programaren barruan, igandean, maiatzak 26, orientazio proba egin genuen Butroe ibaiaren inguruan. Bertaratutako batzuentzat estreinaldia izan zen lasterketa hura, gerturatutako beste batzuk eskarmentu handikoak ziren. Baina guztiok, hasiberriok zein adituek biziki gozatu genuen, izan ere,  goiz zoragarria pasatu genuen.

Guztira 42 pertsona hurbildu ginen Butroeko gaztelura. Leku eder eta magiko horretan orientazio proba hasi zen, non kirolariok trebetasuna erakutsi behar genuen eguneko erronka betetzeko, hau da, 7.7 kilometroko ibilbidea egiteko, 300 metroko desnibelarekin, Menditxuko eta Isuskitzamendiko gailurra zapaltzeko, 17 pista topatzeko, eta hori guztia paisaia amaigabe batean, ezin ederragoa, itsasoa eta mendia uztartzen dituena. Goiz zoragarria izan zen, izan ere, euriak berak ere ez zuen parte hartzaileen umore ona lausotu izana lortu.

Baziren 1. pistatik hasi zirenak, baziren 17.etik hastea erabaki zutenak. Hala ere, hasieratik amaierara edo amaieratik hasierara, batzuek zein besteek egokitutako 17 pistak aurkitu behar zituzten. Puntu guzti-guztiak ondo seinaleztatuta zeuden mapan, baina denak ez ziren hasieran ematen zuen bezain erraz aurkitzen. Alabaina, guztiok lan ederra egin genuen eta poz-pozik heldu ginen helmugara. Egunari amaiera emateko hamaiketakoa egin genuen eta benetan zein gozo zegoen dena.

Butroe gaztelu inguruan inoiz egon ez bazara, hurrengoan argazki batzuk utziko dizkizuegu ezagutarazteko

                           Eskerrik asko etorri zineten guztioi!!!

Eskerrik asko Aaron!!! Eskerrik asko hor egoteagatik!!! Lan ederra egin zenuen!!!