25
Ira

KIROLA eta NATURA ekimena berriro martxan

KIROLA eta NATURA ekimena berriro martxan
2020ko otsailean Altuben azken mendi-ibilaldia egin genuenean, ez genekien pandemiaren gorabeherak noraino helduko ziren. Orain, hogei hilabete pasa ondoren, gogotsu gaude berriz KIROLA eta NATURA programari heltzeko, eta urria-abendua bitartean hasierako 3 txangoak prest ditugu. Hauek dira, gure proposamenak:

2021/10/24 Entziako baso sorgindua
2021/11/21 Montefuerte parkean orientazioa
2021/12/12 Araotzeko haitzuloak

Informazioa eta izena ematea: http://kirolaetanatura.blogspot.com/

13
Ira

Praktikatu Euskaraz Gurekin

Hasiak dira mintzapraktika programak

Aurten ere, AEKren Praktikatu zerbitzuak hainbat aukera eskaini nahi dizkizu: astean behin mintzataldean bildu eta patxadaz hitz egin; Gurasolagun egitasmoko tailerrak; bestelako jarduerak, hitzaldiak, txangoak, irakurzale-klubak... Beraz, interesik baduzu, eman izena, zabalik dago-eta horretarako epea. Primeran sentituko zara denetan zure helburua beteta: euskara praktikatzea eta lagun berriekin euskaraz egitea.


Oraindik ere ezohiko egoeran jarraitzen dugunez, pandemia dela eta, beharrezko prebentzio-neurri guztiak hartuko ditugu mintzapraktika taldeetan eta ekitaldi guztietan. Horrez gain, aurrez aurreko eskaintza osatze aldera, urriaren amaieran ONLINE taldeetan parte hartzeko aukera luzatuko dugu.

Hortaz, gure eskaintza erakargarria iruditzen bazaizu, jo euskaltegira, euskara-elkartera edo euskara-zerbitzura edota bete fitxa hau.

01
Uzt

Udan ere, Euskaraz

Hondartzan, barnetegian, mendian, euskaltegian, lanean, jaietan, atzerrian, etxe ondoan... Udan ere #PRAKTIKATUetaBIZI

Irailean itzuliko gara. 😎

24
Eka

Parte-hartzaileen gogobetetzea.

Apirila eta maiatza bitartean mintzapraktika egitasmoetako parte-hartzaile guztiei inkesta anonimoa bidali zitzaien, eta 803 lagunen erantzunak jaso ziren. Esan dezakegu 2020-2021 ikasturteko balorazioak oso positiboak izan direla, izan ere, gogobetetzearen batez bestekoa 8,4 izan da.

 

Tipologiari erreparatuta parte-hartzaileen %63 bidelariak dira (batez ere, euskara praktikatzeko helburuz ibili diren euskara ikasleak edo ikasle ohiak). Beste %27 bidelagunek osatzen dute. Azken horiek, bi arrazoi nagusi aipatu dituzte proiektuan parte hartzeko: euskaraz hitz egiteko espazio berriak topatzea eta praktikatu nahi duenari laguntzea. 

 

Erabilerari dagokionez, egitasmoan dabilenetik bidelarien % 70ak euskaraz gehiagotan egiten duela adierazi du.

Amaitzeko, parte-hartzaileen testigantzak ere jaso izan dira, horietako batzuk hemen (https://praktikatu.eus/testigantzak) ikusgai daude.

10
Eka

Poltsikorako hitanoa liburuxka

Poltsikorako hitanoa liburuxka argitaratu dute Durangaldeko berbalagunek

Durangaldean hitanoz naturaltasunez egiten duten herritar gehienek 70 urte baino gehiago dituzte; gazteagoen artean, aldiz, eta salbuespenak salbuespen, ez dago hitanoz aritzeko ohitura handirik. Hori dela eta, Durangaldeko berbalagunek eskualdeko hitanoaren erabilera sustatzeko ekimen bi abiatu dituzte: Hiketalagun taldeak eta Poltsikorako hitanoa liburuxka.

Hiketalagun taldeak

2020ko abenduan, aste gutxian, 40 lagunek baino gehiagok eman zuten izena hitanoz berba egiten ikasteko eta praktikatzeko. Urtarrilean hastekoak ziren, baina osasun egoera zela kausa atzeratu egin behar izan zuten; uda ostean, berriro irekiko da izena emateko epea. Hitanoz jarduteko taldeak sortu aurretik, hilabeteko ikastaroa eskainiko da. Bai ikastaroa bai taldeetako parte-hartzea doakoak izango dira.

Poltsikorako hitanoa liburuxka

Era berean, Poltsikorako hitanoa liburuxka argitaratu dute, Hiketalagun taldeen osagarri. Bertan, Durangaldeko hitanoan berba egiteko beharrezko azalpen guztiak ageri dira: noiz eta nola erabili, aditz-taulak… Formatu digitalean ere eskura daiteke: https://labur.eus/2ENfR

Liburuxka osatzeko eta ikastaroa emateko, hitanoak izandako hiztun-galerarekin kezkatuta dauden iurretar batzuen laguntza jaso dute.

Aurkezpena, bertso-saioan

Hau guztia biribiltzeko, Berbalagun egitasmoak, Iurretako jai batzordearekin batera, bertso-saioa antolatu du ekainaren 20an Iurretako plazan. Unai Iturriaga, Miren Amuriza, Eli Pagola eta Eneko Abasolo “Abarkas” hiketan ariko dira, eta gai-jartzailea Maite Berriozabal izango da. Saioa arratsaldeko 18:00etan hasiko da.

Beste herrietara zabaltzeko aukera

Zuen herrian/eskualdean Hiketalagun martxan jarri, edota horrelako liburuxka bat argitaratu nahi baduzue; jarri harremanetan Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. eta abiatzeko aukera aztertuko dugu.

 

06
Mai

Udan ere, Euskaraz, Seguru

Dagoeneko zabalik dago udako mintzataldeetan apuntatzeko epea.

Ikasturtea amaitzearekin batera, talde batzuk desagertu egiten dira; beste batzuk, aldiz, partaide berriak hartu eta birsortu egiten dira. Horietakoren batean parte hartu nahi baduzu, zure herriko euskaltegian izena eman edo bete fitxa hau.
...eta guztia DOHAINIK  

Izena emateko azken eguna: ekainak 11

 

OHARRA: Mintzapraktika taldeetan, eta antolatzen ditugun ekintza guztietan, segurtasun neurriak bermatuta daude, eta era berean COVID19rako protokoloa aplikatzen dugu.

03
Ots

Pirinioetako mintzakide programa abiatu da

2021eko otsailaren 1ean abian jarri da Pirinioetako mintzakide egitasmoa. Datozen asteotan aurkezpen-bilerak egingo dira programaren xehetasunak emateko eta lehenengo mintzataldeak osatzeko. Ondokoak dira programaren sustatzaileak: Auritz, Artzibar, Erroibar, Luzaide, Orreaga eta Agoizko udalak; Aezkoako Batzarre Nagusia; eta Pirinioetako AEK euskaltegia. Dagoeneko, izena emateko aukera zabalik dago udaletxe guztietan, AEKren euskaltegian eta praktikatu.eus webgunean.
Informazio gehiago nahi izatekotan, bidali whatsappa telefono honetara: 607 642 078

15
Urt

Gurekin euskaraz seguru!

Gure mintzapraktika taldeetan segurtasun neurri guztiak betetzen ditugu, espazio seguruetan, talde txikietan... Online aukera ere baduzu.

 

Parte hartzea dohainik da, eta gainera, hainbat abantaila daude: sariak, deskontuak...

Gurekin euskaraz seguru! EMAN IZENA

09
Aza

Mintzapraktika taldeetan euskaraz praktikatzen jarraitzen dute

Mintzapraktika talde asko kafetegi eta tabernetan batu izan dira orain arte. Orain Euskal Herria osoan ostalaritza itxita egon arren, kide hauek bestelako aukerak izango dituzte, egoera honetan ere, euskaraz praktikatu eta bizitzeko: espazio publikoak desberdinetan elkartuko dira (plazak, parkeak...) edota eguraldia kaxkarra denean, bestelako gelak (kultur etxeak, aretoak, kiroldegiak, frontoiak...) erabiliko dira, segurtasun neurri guztiak (distantziak, musukoa...) bermatuta.

Beste dinamika batzuk ere sustatuko dira: Pasolagunak, esaterako. Ibiltzea gustuko duten eta euskaraz gehiagotan egin ahi duten lagunei zuzendutako taldeak, eta online ere bai.

Euskaraz praktikatzen eta bizitzen jarraituko dugu!!

10
Aza

Praktikatu ONLINE

COVID-19ak konplikatu ditu herritarron arteko kontaktuak, horregatik, euskaraz online praktikatzeko aukera berriro zabaldu nahi dugu.

Zer egin behar da parte hartzeko?

1. Behean dagoen loturan aukeratu modalitatea: AURREZ AURRE, ONLINE, ala BIETARA
2. Markatu nahiago d(it)uzun egun(ak) eta ordutegia(k)

Parte hartzea dohainik da, gainera, izena ematen dutenen artean 10 sari-kutxa zozketatuko ditugu.

Animatu eta eman izena

Oharra: Momentuz, Praktikatuk abian dituen egitasmoetan baino ez da martxan jarriko.